ՀՀ կառավարության N 157-Ն որոշմամբ զգալիորեն ընդլայնվել է փոխհատուցվող սոցիալական ծախսերի շրջանակը: Կրթության և առողջապահության ոլորտներում ներդրվել են նոր ուղղություններ և փոփոխվել են փոխհատուցման որոշ ընթացակարգեր:
Կրթության գծով նոր փոխհատուցվող ուղղություններ
Կրթության գծով սոցիալական ծախսերի փոխհատուցման շրջանակն այժմ ներառում է նաև՝
- Երաժշտական, արվեստի, գեղարվեստի և պարարվեստի դպրոցներ
- Արտադպրոցական կազմակերպություններ և կենտրոններ
- Մանկապատանեկան մարզադպրոցներ
- Կրթության պետական կառավարման լիազոր մարմնի կողմից երաշխավորված այլ արտադպրոցական ծրագրեր
- Ոչ ֆորմալ կրթական ծրագրեր
Այս ուղղություններով կրթական ծախսերը կփոխհատուցվեն նաև 2024 թվականի համար, պայմանով, որ վճարումները կատարվել են անկանխիկ եղանակով:
Կրթական ծրագրերի երաշխավորման պայմանը
Արտադպրոցական և ոչ ֆորմալ կրթական ծրագրերի համար կատարված վճարումները ենթակա են փոխհատուցման, եթե այդ ծրագրերը երաշխավորված են լիազոր մարմնի կողմից՝ հաշվարկային փաստաթղթի դուրս գրման ամսաթվի դրությամբ:
Կարևոր! 2024 թվականի համար կրթական ծրագրի երաշխավորված լինելու հանգամանքը կդիտարկվի հայտարարագրի ներկայացման պահի դրությամբ: Հետևաբար, 2024 թվականի ընթացքում մատուցված ծառայությունների մասով փոխհատուցում ստանալու համար անհրաժեշտ է, որպեսզի կրթական ծրագրերը երաշխավորվեն մինչև հայտարարագրի ներկայացումը:
Դասագրքերի վարձակալության վճարների փոխհատուցում
Նոր որոշմամբ կփոխհատուցվեն նաև միջնակարգ (ընդհանուր, մասնագիտացված, հատուկ) կրթության շրջանակում դասագրքերի վարձակալության գծով կատարված ծախսերը՝ յուրաքանչյուր աշակերտի համար տարեկան մինչև 3000 դրամի չափով:
Այս մասով փոխհատուցումը կտրամադրվի նաև 2024 թվականին կատարված ծախսերի համար: Կարևոր առանձնահատկություն. դասագրքերի վարձակալության դեպքում չի պահանջվի հաշվարկային փաստաթուղթ, այլ հիմք կընդունվի լիազոր մարմնի կողմից հարկային մարմնին տրամադրված
տեղեկատվությունը (աշակերտների և նրանց ծնողների անուն, ազգանուն, ՀԾՀ):
Առողջապահության գծով ընդլայնված փոխհատուցումներ
Ատամնաբուժական ծառայությունների փոխհատուցում
Առողջապահության գծով սոցիալական ծախսերի փոխհատուցման շրջանակն ընդլայնվել է: Հայաստանում գործող ապահովագրական ընկերություններից առողջության ապահովագրական փաթեթի ձեռքբերումից բացի, կփոխհատուցվեն նաև 2024 և 2025 թվականների հաշվետու տարիների ընթացքում Հայաստանում ատամնաբուժական ծառայությունների համար կատարված վճարումները:
Կարևոր! 2024 թվականի ընթացքում կատարված ատամնաբուժական ծախսերը կփոխհատուցվեն միայն անկանխիկ վճարումների դեպքում:
Ի տարբերություն առողջության ապահովագրական փաթեթի, որից սոցիալական փաթեթի շահառուները կարող էին օգտվել միայն իրենց ընտանիքի անդամների համար, ատամնաբուժական ծառայությունների դեպքում նրանք կարող են օգտվել նաև իրենց համար կատարված ծախսերի փոխհատուցումից:
Անկանխիկ վճարման պարտադիր պահանջը
2025թ. փետրվարի 15-ից ուժի մեջ մտած կառավարության որոշմամբ սահմանվել է պարտադիր պայման՝ առողջապահության և կրթության գծով բոլոր ուղղություններով կատարված սոցիալական ծախսերը կփոխհատուցվեն միայն անկանխիկ եղանակով կատարված լինելու դեպքում:
Բացառություն են կազմում միայն դասագրքերի վարձակալության նպատակով կատարված ծախսերը, որոնց համար վճարման եղանակը հաշվի չի առնվում:
Լիազոր մարմինները համապատասխան տեղեկատվությունը կփոխանցեն հարկային մարմին
Որոշմամբ սահմանվել է նաև տեղեկատվության փոխանցման կարգը՝
- Կրթության պետական կառավարման լիազոր մարմինը երաշխավորված արտադպրոցական և ոչ ֆորմալ կրթական ծրագրեր իրականացնողների վերաբերյալ, ինչպես նաև դասագրքերի վարձակալության դեպքում աշակերտների և նրանց ծնողների մասին անձնավորված տեղեկատվությունը յուրաքանչյուր հաշվետու տարվա մասով հարկային մարմին պետք է ներկայացնի մինչև հաշվետու տարվան հաջորդող տարվա փետրվարի 1-ը ներառյալ։
- Առողջապահության պետական կառավարման լիազոր մարմինն ատամնաբուժական ծառայություններ մատուցող հարկ վճարողների վերաբերյալ տեղեկատվությունը 2024 թվականի հաշվետու տարվա մասով հարկային մարմին պետք է ներկայացնի մինչև 2025 թվականի ապրիլի 1-ը ներառյալ, իսկ 2025 թվականի հաշվետու տարվա մասով՝ մինչև հաշվետու տարվան հաջորդող տարվա փետրվարի 1-ը ներառյալ:
Տեղեկատվությունը ստանալուց հետո հինգ աշխատանքային օրվա ընթացքում այն կներառվի հարկային մարմնի տեղեկատվական համակարգում:
Փոխհատուցման առավելագույն չափը
Փոխհատուցման առավելագույն չափը մնացել է անփոփոխ՝
- Առողջապահության գծով՝ տարեկան 50,000 դրամ
- Կրթության գծով՝ տարեկան 100,000 դրամ
Ձեր և Ձեր ընտանիքի անդամների համար կատարված բոլոր ուղղություններով սոցիալական ծախսերի հանրագումարը չպետք է գերազանցի տարեկան 100,000 դրամը: Կառավարության որոշմամբ ավելացված նոր ուղղությունները ևս ներառվում են տարեկան առավելագույն չափի մեջ:
Հղում՝ https://www.src.am/am/getNews/891
